कोशी प्रदेशका दुई दर्जन पुल निर्माण ‘अल्झिए’ : आधाभन्दा बढीको प्रगति ५० प्रतिशतमै

Ecoecopolitics Desk२ दिन अगाडि

विराटनगर । कोशी प्रदेशका पहाडी तथा तराईका जिल्लाहरू जोड्ने महत्त्वपूर्ण सडक सञ्जालअन्तर्गत निर्माणाधीन पुलहरूको निर्माण कार्य अत्यन्तै सुस्त देखिएको छ। संघीय सरकारको सडक विभागअन्तर्गत पुल सेक्टर (धरान)ले हेर्दै आएका करिब ४ अर्ब ६२ करोड ५३ लाख रुपैयाँ लागतका दुई दर्जन पुलमध्ये अधिकांशको प्रगति निराशाजनक अवस्थामा पुगेको तथ्याङ्कले देखाउँछ।

यी पुलहरूमध्ये हालसम्म १ अर्ब ५८ करोड ९९ लाख ३० हजार रुपैयाँ भुक्तानी भइसकेको छ, जुन कुल लागतको करिब ३४.३७ प्रतिशत हो। तर रणनीतिक महत्वका नौ वटा पुलको प्रगति झनै कमजोर छ। यी पुलहरूका लागि ७६ करोड ९८ लाख रुपैयाँमा ठेक्का सम्झौता हुँदा पनि वित्तीय प्रगति १५ करोड २७ लाख रुपैयाँ (२० प्रतिशतभन्दा कम) मात्र पुगेको छ।

त्यसको तुलनामा स्थानीय तहका १३ पुलका लागि ३ अर्ब ८५ करोड ५५ लाख २० हजारमा ठेक्का सम्झौता भए तापनि हालसम्म १ अर्ब ४३ करोड ७१ लाख रुपैयाँ मात्र भुक्तानी भएको देखिन्छ।

◼ २२ पुलमध्ये ३ मात्र सन्तोषजनक

पुल सेक्टर, धरानले दिएको तथ्याङ्कअनुसार कोशी प्रदेशका विभिन्न जिल्लामा निर्माणाधीन २२ पुलमध्ये केवल ३ पुलको प्रगति सन्तोषजनक रहेको छ। बाँकी अधिकांश आयोजनाहरू वर्षौँदेखि अल्झिएको अवस्था छ।

◼ ५० प्रतिशत नपुगेको भौतिक प्रगति

सूचना अधिकारी नवीन कुमार साहका अनुसार आधाभन्दा बढी पुलको भौतिक प्रगति ५० प्रतिशत नाघ्नै सकेको छैन। विशेषगरी LRN तथा SRN अन्तर्गतका पुलहरूको अवस्था अत्यन्तै दयनीय छ।

• इलामको देउमाई खोला पुल : भौतिक प्रगति—९%

(ठेक्का: नागार्जुन/प्रधान JV, सम्झौता—२०७७/७८)

• उदयपुर–खोटाङ जोड्ने बन्सिलाघाट पुल : भौतिक प्रगति—९%, वित्तीय—११%

(ठेक्का: कालिका/बेदान्सी JV, सम्झौता—२०७६/७७)

◼ तमोर कोरिडोरका पुल पनि सुस्त

प्रदेशको गौरवको आयोजना मानिएको तमोर कोरिडोर अन्तर्गत नावा खोला, हेवा खोला, लोरिपा खोला र लाखुवा खोलाका पुलहरूमा औसत प्रगति अत्यन्तै कम छ।

शर्मा/सगुन JV ले निर्माण गरिरहेको यी प्याकेजको समग्र वित्तीय प्रगति१५.१७ प्रतिशतमात्र छ।

• लाखुवा खोलाको प्रगति—१८%

• रघुवा खोलाको प्रगति—२०%

◼दुधकोशी पुलको अवस्था ‘शून्य’

मुलघाट–खोटाङ–ओखलढुंगा (तलुवा) जोड्नेदुधकोशी पुलको भौतिक प्रगति शून्य रहेको छ भने वित्तीय प्रगति २ प्रतिशत मात्र छ।

(ठेक्का: कालिका/प्यासिफिक JV, सम्झौता—२०७६/७७)

◼‘भौगोलिक कठिनाइ र निर्माण व्यवसायीको ढिलासुस्ती’

सुस्त प्रगतिबारे बोल्दै सूचना अधिकारी साह भन्छन्—

‘केही पुल अन्तिम चरणमा छन्, तर धेरैमा समस्या देखिएको छ। भौगोलिक चुनौती, कोभिडको प्रभाव र निर्माण व्यवसायीको ढिलासुस्तीका कारण प्रगति रोकिएको हो।’