जेनजी प्रदर्शनीका आगजनीको वैज्ञानिक जाँच तीव्र, सिंहदरबार–राष्ट्रपति भवनको खरानी भारत लैजाँदै

Ecoecopolitics Desk२ दिन अगाडि

जेनजी प्रदर्शनका क्रममा राजधानीभरि भएका आगजनी, तोडफोड र आपराधिक गतिविधिका घटनामा प्रहरीले अनुसन्धान तीव्र पारेको छ। देशका अत्यन्तै संवेदनशील मानिने सिंहदरबार, राष्ट्रपति भवन, संसद् भवन, मन्त्री क्वार्टर र सर्वोच्च अदालतसम्म आगो लगाइएका घटनामा विस्तृत वैज्ञानिक परीक्षण अघि बढाइएको प्रहरीले जनाएको छ। भदौ २४ र २५ गते उपत्यकामा मात्र २२८ भवनमा आगजनी भएको तथ्यांक सार्वजनिक भएको छ, जसमा पाँचवटा न्यायालयका भवन समेत थिए। आगो निभाउन कठिन भएको कारण प्रदर्शनकारीहरूले पेट्रोल–डिजेलबाहेक अन्य केमिकल प्रयोग गरेको शंका उठे पनि सामाखुशीस्थित विधिविज्ञान प्रयोगशालामा गरिएको परीक्षणमा कुनै शंकास्पद रसायन फेला नपरेको अनुसन्धान टोलीले बताएको छ। थप पुष्टि गर्न जलेका संरचनाबाट सङ्कलन गरिएको खरानी भारत पठाउने तयारी भइरहेको छ।

प्रदर्शनका घटनासम्बन्धी काठमाडौंमा मात्र १०४ उजुरी दर्ता भएका छन्। तीमध्ये २२ व्यक्तिगत, ६६ सरकारी कार्यालय र १६ व्यापारिक तथा संस्थागत प्रतिष्ठानबाट दर्ता भएको प्रहरीले जनाएको छ। उजुरीका आधारमा प्रहरीले २६७ जनालाई पक्राउ गरिसकेको छ, जसमा ८७ जना हाजिर जमानीमा छुटेका छन्। ११३ जनामाथि थुनामा राखेर अनुसन्धान भइरहेको छ भने ३३ जना अदालतको आदेशमा धरौटीमा र ४३ जना पुर्पक्षका लागि थुनामा रहेका छन्। भदौ २३ र २४ को प्रदर्शनमा उपत्यकामा मात्र ४९ जनाको मृत्यु भएको र देशभर ७६ जनाले ज्यान गुमाएको प्रहरी तथ्यांकले देखाएको छ।

संवेदनशील सरकारी संरचनाबाहेक आगजनीमा परेका केही शीर्ष नेताहरूका घरको खरानी परीक्षण पनि भइरहेको प्रहरी स्रोतले जनाएको छ। तत्कालीन प्रधानमन्त्री केपी शर्मा ओली, कांग्रेस सभापति शेरबहादुर देउवा, पूर्वप्रधानमन्त्री पुष्पकमल दाहाल ‘प्रचण्ड’सहितका नेताहरूका जलेका घरमा अवैध स्रोतको रकम वा अन्य संवेदनशील सामग्री नष्ट भएको आशंकामा खरानी परीक्षण अघि बढाइएको हो। अपराध अनुसन्धान विभागका एक अधिकारीका अनुसार, नेताहरूका घरमा जलेको सामग्रीमा कुनै अतिरिक्त रसायन प्रयोग भएको छ कि भन्नेबारे वैज्ञानिक विश्लेषण भइरहेको छ।