अन्नपूर्ण गाउँपालिकामा पर्यटकको सुरक्षाका लागि लेक लाग्ने उपचार तयारी
Ecoecopolitics Desk२ हप्ता अगाडि
अन्नपूर्ण गाउँपालिकाले पर्यटकको स्वास्थ्य र सुरक्षालाई ध्यानमा राख्दै उच्च पहाडी र हिमाली क्षेत्रका पदयात्रा मार्गहरूमा लेक लाग्दा प्राथमिक उपचार दिने तयारी थालेको छ। अक्सिजनको कमीका कारण हुने लेक लाग्ने समस्या हिमाल चढ्ने पर्यटक र स्थानीय दुवैमा सामान्य हुने भएकोले स्वास्थ्यकर्मी र होटल व्यवसायीलाई तालिम दिइएको हो।
गाउँपालिकाका स्वास्थ्य शाखा प्रमुख समुन्द्र बरुवालका अनुसार, वडाहरू ४, ५, ६, ७ र ८ मा रहेका स्वास्थ्य संस्थाका कर्मचारी र पर्यटकीय स्थलका होटल व्यवसायीहरूलाई आधारभूत प्राथमिक उपचार तालिम प्रदान गरिएको छ। तालिममा लेक लाग्दा देखिने लक्षण, आवश्यक औषधि प्रयोग गर्ने तरिका, घरेलु उपायमार्फत उपचार गर्ने विधि र सुरक्षित पहाडी यात्रा सम्बन्धी जानकारी दिइएको छ।
यसअघि गण्डकी प्रदेशको प्रादेशिक स्वास्थ्य तालिम केन्द्र, पोखराको प्राविधिक सहयोगमा मनाङको चामेमा रहेको हिमालयन रेक्यु एसोसिएसनमार्फत स्वास्थ्यकर्मीलाई तालिम दिइएको थियो। पछिल्लो चरणमा सोमबार पोखरेबगरमा अन्नपूर्ण आधार शिविर, मौरिस हर्जोग पदमार्ग, खोपारा, बयली, घोडेपानी, पुनहिल, फूलबारी र मोहरेडाँडा जस्ता प्रमुख पर्यटन र पदयात्रा स्थलका २५ जना होटल व्यवसायीलाई तालिम दिइएको छ।
गाउँपालिकाले चालु आर्थिक वर्षमा रु ३ लाख बजेट विनियोजन गरेको छ। यस बजेटबाट आवश्यक औषधि खरिद गरेर पर्यटकका लागि उपलब्ध गराउने, पदयात्रामा जानेहरूलाई स्वास्थ्य सम्बन्धी जानकारीमूलक सामग्री वितरण गर्ने र पर्यटक स्थलहरूमा सार्वजनिक सूचना राख्ने तयारी गरिएको छ।
बरुवालले भने, “अब पर्यटकहरू अन्नपूर्णको रमणीय हिमाली क्षेत्रको यात्रा गर्दा स्वास्थ्य सुरक्षा सुनिश्चित गर्न सक्नेछन्। हामीले स्थानीय जनशक्तिलाई तयार पारेका छौँ जसले आपतकालीन अवस्थामा तुरुन्त सहायता दिन सक्नेछन्।”
यो पहलले अन्नपूर्ण क्षेत्रमा पर्यटनलाई अझ सुरक्षित र जिम्मेवार बनाउने लक्ष्य राखेको छ। यसले पर्यटकहरूलाई हिमाली यात्राको अनुभव लिन सजिलो बनाउने मात्र होइन, स्थानीय व्यवसायी र स्वास्थ्यकर्मीको क्षमता पनि वृद्धि गर्ने विश्वास व्यक्त गरिएको छ।
